 |
Ya, August shata 11 ya pi du sai, shaning gaw 1926 ning re nga. An lahkawng Jinghpaw mung ga de Hkalup sasana a matu du sa ai 35 ning pi du sa hka, ndai shata gaw lanamta re nga hte maren marang mung nsim nsa htu nga ai. Ngai gaw dung hkumhta Chyum laika hti let dung nga ai.
Oh..yu le, nye a tsawra nja sara Ola Hanson wa ya du hkra dating dakrang Chyum laika hpe Jinghpaw hku ga gale taw nga ai. Ngai gaw shi a ningrum ningtau rai nngai. Laisai ginhtawng ta hta ngai hpe tsun ai,
“Tsaw Minne e, ngai dairam kahtet ai lamu marang masa hpe ndang hkam sai. Ya, Sinlum Kaba bum de naw lung let Chyum laika naw ga gale na.” Rai nga ai, Ndai Bhamo na jinghtawng gaw grai ahtet nga ai.
Shi tsun ai, “ Karai Wa ngai hpe n-gun atsam jaw ai rai yang, lahkawng ning laman Ga Shaka Dingsa hpe ga gale shangut mayu,” nga nna ngai tsun ai re.
Htaw... yu ya mung, Hanson gaw, Hebre Chyum laika hpe hti nna she, English, German, Swedish Chyum laika ni hte shingdaw rai nna kyin nga ai. Shi na makau kaw gaw Sr. Labya De tsap nna karum nga ai.
Nye a tsawra madu wa Hanson, Karai Kasang a n-gun atsam hte sha nrai yang, yadu hkra hkamjan lu na nrai nga ai. Shi a nsam ni pi laisai ten na hte nbung sai. Shi na miman ni pi asit ba ba ahe rai taw sai. Lata lamyi ni ma hpraw ma sai. Jinghpaw amyu sha ni hpe Karai mungga nhtoi Chyum laika hpe jaw mayu ai gaw, shi a myit ngun nan rai nga.
Jinghpaw mung sasana shang 50 ning Ja Jubilee hpe kade nna yang galw sana. Hanson tsun ai, shi Zehpani hte Malahki sha ra sai nga re. Shi tsun ai, “ Ngai Jubilee poi rai ndu shi yang lawan ngut mayu ai.” Shi a lata hte nan Sunpawng myu sha ni hpe Chyoipra ai Chyum laika hpe ap mayu ai. Hason gaw, Ga Shaka Ningnan hpe shawmg gale ngut sai. Shi myit ndik nnla alang lang gram lajang da re nga ai.
Ngai hti taw chyumdaw pi gara du sa ta? Nye a madu wa rai nga ai hte maren, shi lawan Chyum ga le n ngut na hpe mung myit tsang nga ai, ngut nna shi a hkam kaja lam hpe mung rai nga.
“Minnie, Minne,” ngai hpe Hanson shaga taw nga. Hpa wa rai kun?
“Minnie, ndai de sawa yu rit,”
Hanson hkum npyaw taw kun? Shi shaga nsen wa gari taw nga ai. Ngai rawt nna shi hpang de sa wa yang, Hanson na mi kata na miprwi pru taw ai. Dai miprwi nang shi ga shaga yang marit shun nga ai. Kabu awlaw ai miprwi nang rai nga ai.
“Shaning sumshi-kru ning ting shakut wa ai ya ngut sai. Jinghpaw laika hku Ga Shaka Dingsa na hpang jahtum chyumdaw hpe ga gale ngut sai Minnie hte Sara Labya De e. Karai hpang de chyeju shakawn akyu hpyi ap nawng ga law.” Hason a kabu awlaw ai miman nsam hte tsun ai hpe ngai mu ai.
Nye a nja Sara Ola Hanson kabu pyaw nga ai. Ngai mung rau kabu nngai. Jinghpaw wunpawng shani a nhtoi laika, Chyoipra ai Chyum laika hpe shahte a kanu ga hku lu hkra Karai Karang Yehowah lam hpaw ya sai re. Laisai 35 ning hta laika nlu ai Kachin amyu ni, ya Karai Kasang a ninghtoi hkum kashu kasha ni tai sa na.
Anhte masum, rau hput di di let, lata jum nna, Karai a man de dai aten hpe sak jaw sai. Akyu hpyi nga ten hta mung, nye a madu wa Hanson a lata mung gari taw nga sai. Nye a kata hpe shi a lata ntsaa mara jum da let...
Marip Awng Mai
10.8.2019
Comments
Post a Comment